【废墟摄影】荒废17年嘅电气化火车

大家平时搭火车经过火炭站嘅时候，有冇留意到有一列第一代嘅黄头电气化火车停喺车厂入面呢？自从我几年前知道佢嘅存在之，我每次搭火车经过火炭都会留意下佢仲健唔健在，一直都好想入去一探呢架硕果仅存嘅黄头火车。早排终于的起心肝用自己方式入去车厂为佢留影。

黄色头係唔係好亲切呢？其实车头鬆黄色係一个警戒色，因为电气化列车相对柴油列车行车速度高且宁静，而且当时铁路沿线仍有好多地方係开放嘅，随时可能有人误闯路轨，所以九铁便跟随英国做法，将电气化火车车头髹上黄色警戒色。

至于点解呢一列黄头可以逃过翻新而幸存落莅。其实係因为1984年一列黄头(E45)喺上水出轨，导致两个普通等车卡234,235号(旧编号)报废，剩余一卡头等233(旧编号)号未有损毁。数年后列车(E58)于厂内发生意外，撞毁一个头等车卡458号。于是九铁利用多出嘅头等卡233号顶替458号位置。

估计可能因为两次意外总共损失3卡车箱，之后亦未有订购新列车填补空缺，导致最后九铁为黄头进行中期翻新工程时多出3卡列车，无法併成一组12卡列车而未被翻新，所以呢一组E44号列车可以逃过翻新幸存落莅。

路线图停留喺未有落马洲支线，九龙塘站写住转乘地下铁路嘅年代，同埋车门上九铁系嘅警告，全部都代表一个逝去嘅年代

经典嘅橙色硬胶櫈，仲有啲波波扶手

以前嘅坐位係对对住咁住坐，方便倾计之余又好有外国feel

贸意下左右两边嘅路线图，两边方向係唔同嘅，当你面向幅图嘅时候係跟住个行车方向，下一个站就会喺车头方向嗰边

仲係地下铁路！

3 + 2 座位排列唔係得巴士先有，以前黄头上面都有

3人座位坐入面嗰个要出莅都几麻烦

以前地铁同火车未翻新之前，车门前嘅地板都刻住车厂名，唔知大家仲记唔记得呢？火车呢个仲写住ENGLAND架！

细个唔多机会搭火车，嗰时火车唔係好迫，就算搭，父母都唔会坐头等，所以从来都冇坐过黄头嘅。同行朋友同我一样都冇坐过，而家终于有机会坐返当年冇搭过嘅头等

其实最初嘅头等啲櫈係橙红色嘅同埋窗边係有张几仔，张几仔喺80年代中九铁改装车厢嘅时候拆左，至于张櫈几时变左色就真係唔知

头等前面就係行李仓，乘客如需使用行李仓需为购买行李票，朋友以前试过坐行李仓，据讲以前如果太多人係会放人入去行李仓。唔知大家又有冇试过上行李仓呢？

準备进入驾驶室，可以见车头嘅到紧急逃生门

终于有机会入到火车驾驶室参观，我觉得成个驾驶室嘅精髓係车顶嗰盏灯，盏灯睇落好鬼old fashioned 好有味道

驾驶室内嘅控制面板，有啲电车GO嘅feel

17年前嘅今日就係第一代黄头电气化火车最后一日载客，唔经唔觉17年过去，翻新左嘅佢好快亦都会退下火线。希望呢一列因意外而幸存嘅黄头有朝一日可以被人修复重见天日，唔会被当成废铁消失于无形啦。

P.S 感谢K.H Ng 提供第一代电气化火车荣休之旅相片

© 2016 - 无人之境 ∣ Abandoned HK

无人之境Facebook: https://www.facebook.com/abandonedhkre